MIGUEL ANXO MARTÍNEZ OUBIÑA GAÑA O XLII CERTAME NACIONAL GALEGO DE NARRACIÓNS BREVES "PREMIO MODESTO R. FIGUEIREDO"

MIGUEL ANXO MARTÍNEZ OUBIÑA GAÑA O XLII CERTAME NACIONAL GALEGO DE NARRACIÓNS BREVES "PREMIO MODESTO R. FIGUEIREDO"
Luns 9 de Xaneiro de 2017 - O xurado concedeu dous accésits ás obras de María Greys López e de Emma Pedreira. A entrega de premios terá lugar o día 3 de febreiro, ás 20. 30 horas na Biblioteca municipal Varela Jácome.

O XLII Certame Nacional Galego de Narracións Breves “Premio Modesto R. Figueiredo”, organizado pola Fundación Padroado do Pedrón de Ouro, que este ano acolle o Concello de Lalín, xa ten gañador. Trátase do escritor e xornalista Miguel Anxo Martínez Oubiña, de Vilagarcía de Arousa. O Xurado do certame, reunido esta mañá nas dependencias do Concello de Lalín, recoñeceu a obra deste autor titulada A vinganza de Valdedeus. Houbo, tal e como indicou a concelleira de Cultura, Lara Rodríguez Peña, que formou parte do tribunal, “unanimidade na escolla, resultando o relato de Anxo Martínez Oubiña o favorito de todos os representantes cando se fixo a posta en común”. O texto vencedor do que se considera o certame literario máis antigo de Galicia está dotado cun premio en metálico de 1.000 euros.

Por outra banda, o xurado concedeu dous accésits -premiados con 400 euros cada un- ás autoras Iris Maria Greys López por Por que estamos aquí? E Emma Pedreira, por Poder de alumear. Ambas escritoras son de A Coruña. A entrega dos galardóns terá lugar o día 3 de febreiro ás 20.30 horas, na Biblioteca municipal Varela Jácome.

O xurado que seleccionou as obras estivo formado polo escritor Carlos Negro, por Adolfo Caamaño, por Luís Menéndez, do Pen Club, por Lara Rodríguez Peña, en representación do Concello e por Xosé Ramón Fandiño e David Otero, de O Pedrón de Ouro, con voz pero sen voto. En total entraron a concurso 75 traballos, polo que a decisión do tribunal foi complexa. O Certame Nacional Galego de Narracións Breves, que dende o 1975 leva o nome de “Modesto R. Figueiredo”, celébrase dende hai 42 anos organizado pola Fundación Padroado do Pedrón de Ouro e foi pensado para que cada edición arribase nun concello diferente, chegando, nesta ocasión, ao de Lalín. Os relatos elixidos son publicados nun libro cada dúas edicións.

Portal Transparencia

Roteiros de Lalín